Հարց`

Երեխաս սովորում է 2-րդ դասարանում: Դասապատրաստման ընթացքում  նկատում եմ,  որ կարդում և գրում է սխալներով: Առանձին  տառերը  ճանաչում է,  սակայն այն տառերը, որոնք իրար նման են գրվում կամ արտասանվում, շփոթում է:

Պատասխան`

Խոսքը՝ որպես հաղորդակցման գործունեության  տեսակ առաջնահերթ է և անփոխարինելի: Մարդկային խոսքը, ըստ դրսևորման եղանակի, ունի 2 հիմնական ձև՝ բանավոր և գրավոր:

Դպրոցահասակ երեխաների շրջանում հաճախ ենք հանդիպում գրի և ընթերցանության դժվարությունների: Կախված երեխայի առանձնահատկություններից՝ յուրաքանչյուրի մոտ դժվարությունները կարող են դրսևորվել տարբեր կերպ: Հարցում նկարագրվածը հիշեցնում է գրի և ընթերցանության կայուն դժվարություններ՝ դիսգրաֆիա, դիսլեքսիա:

Դիսլեքսիան, կամ ընթերցանության խանգարումը, ներառում է բառերի արտասանության, գրելու, արագ կամ բարձրաձայն կարդալու և կարդացածը հասկանալու դժվարությունները:

Հաճախ երեխան տառերն առանձին-առանձին ճիշտ է արտաբերում, բայց գրելու կամ կարդալու ժամանակ նկատվում են վանկերի կառուցվածքային սխալներ։ Հաճախ կարող են բաց թողնել առաջին կամ վերջին վանկը, արտասանությամբ կամ գրությամբ նման հնչյունները կարող են շփոթել, և այլն։

Երեխայի մոտ դժվարություն նկատելու դեպքում պետք է դիմել լոգոպեդի, քանի որ շատ կարևոր է խնդրի վաղ հայտնաբերումը: Պետք չէ մտածել, որ ժամանակի հետ երեխան ինքնուրույն կհաղթահարի դժվարությունը: Կորցրած ժամանակը երեխայի զարգացման ընթացքում ունի կարևոր նշանակություն։ Անհրաժեշտ է պահպանել նաև ծնող-մասնագետ սերտ կապը, և հետևողական աշխատանքի արդյունքում ավելի արագ կնկատվի դրական դինամիկա։

Երեխայի հետ տարվող բոլոր աշխատանքները պետք է կազմակերպել՝ հաշվի առնելով նրա տարիքային և անձնային առանձնահատկությունները։

*Հարցին պատասխանեց Մանկական զարգացման հիմնադրամի Վայքի «ԶարՄան» կենտրոնի լոգոպեդ/հատուկ մանկավարժ Վարդուհի Ղազարյանը:

admin 5 Հոկտեմբերի, 2023 #Պատասխանում_է_մասնագետը